Proqramlaşdırmaya yeni başlayanların nələr etməli ilə bağlı yəqin ki, çoxlu sayda məqaləyə, məsləhətə rast gəlmisən. Bəs proqramçılar hansı səhvlərə yol verməməlidir? Proqramlaşdırma öyrənməyə yeni başlayanlar üçün hazırladığımız bu məqalədə bu suala cavab tapacaqsan.
Copy/Paste
Yazdığın kodu tam başa düşməmiş onu copy paste etməyinin sənə heç bir faydası olmayacaq. Bu sənə işini uzadırsanmış kimi gələ bilər, amma yaxşı proqramçı olmaq istəyirsənsə, bu yoldan keçməlisən.
Səhv etməkdən qorxmaq
Proqramlaşdırma öyrənərkən yazdığın kodun işləməməsi dünyanın sonu demək deyil. Tam tərsi təkrar-təkrar yoxlayaraq səhvlərini düzəltmək ən effektiv öyrənmə üsuludur.
Tutoriallardan asılı olmaq
Bir problemlə qarşılaşanda onu birbaşa "google"lama, ilk öncə özün düşün, problemi həll etməyin yollarını axtar. Bu sənin proqramçı kimi praktiki bacarıqlarının daha da yaxşı olmasına kömək edəcək.
Asandı deyib keçmək
İlk mövzular sənə asan görünür deyə ötürmək istəyə bilərsən, amma unutma ki, ən mürəkkəb məsələlərin təməli də yenə bu sadə mövzulara dayanır. Unutma ki, proqramlaşdırmanı öyrənmək üçün səbrli olmaq vacibdir.
Bütün dilləri eyni anda öyrənməyə çalışmaq
Eyni anda birdən çox proqramlaşdırma dili öyrənmək ilk baxışdan məntiqli səslənə bilər, amma sən robot deyilsən. Öyrəndiklərini qarışdırmamaq və özünə çox yüklənməmək üçün ilk öncə sadəcə bir proqramlaşdırma dilini mükəmməl öyrənməyə çalış.
Təslim olmaq
Kod yazarkən davamlı olaraq səhvlərlə və çətinliklərlə üzləşə bilərsən, amma unutma ki, bu gün sahənin ən yaxşıları hesab edilən proqramçılar da ilk əvvəl sənin yaşadığın problemləri yaşayıblar. Bəs səncə onlar təslim olublar?
